مروة أحمد حسن بطلة الجمهورية في الغطس تروي تفاصيل اعتزالها اللعبة مبكرًا.. وانجازاتها في الأكاديمي لإنشاء مواهب المستقبل


أجري الحوار: محمد سامي

هي أحد الكوادر الرياضية المميزة في رياضة الغطس، منعتها الإصابة في سن مُبكر، ان تواصل مشوارها الحافل بالبطولات والانجازات، إنها مروه أحمد حسن، بطلة الجمهورية السابقة، ولاعبة منتخب مصر في الغطس.

وقام "الأبطال نيوز" بتسليط الضوء، على مروة من خلال حوار جريء، تحكي فيه عن أسرار ترويها لأول مرة، وتميزها في رياضة الغطس، وانشائها لأكاديمي خاصة بتعليم وتدريب السباحة من اجل ترسيخ هذه الفكرة، لكافة شرائح المجتمع، وهذا ما تهدف اليه الأكاديمي.

وجاء الحوار على النحو التالي:

1- في البداية من هي مروة حسن ؟

- أنا اسمي مروه أحمد حسن، عمري 37 سنة، متزوجه ولدي زينه عمرها 13 سنة، و آدم 7 سنوات، وزوجي عمرو حسن مدرس فلسفه وعلم نفس، والدتي ربه منزل وهي اللي كانت مسؤولة عن كل شئ في حياتنا، من دراسه لتمرين، لتوفير كافة شئ، عندي أخ واحد اكبر مني بثلاث سنوات، وهو حاليًا مدير إدارة الـ IT فى البنك الأهلي، والدي كابتن أحمد حسن بطل مصر والبحر المتوسط، في رياضة الغطس وحاليًا مدير فني الناشئين في نادي الجزيره الرياضى، وكان سابقًا مدير فني فريق الغطس في النادي الأهلي، وعمى رحمة الله عليه كان حكم دولي في الاتحاد الدولي للغطس (FINA)، بالإضافة إلى ان العائلة بأكملها في مجال رياضه الغطس، رياضه الغطس هي من الرياضات الصعبه جدًا، وهي عبارة عن مجموعه من القفزات اللي بنأديها من ارتفاعات مختلفه، وفي ناس كتير اوى متعرفش الرياضه دي لأننا لما بنقول غطس الناس بتفتكرها الغوص تحت الماء، أنا اتخرجت من ثانوى عام بمدرسه تجريبية بمجموع 85% أدبي، وكنت مقرره اني ادخل كليه تربيه رياضيه لاني كان هدفي ان اكون دكتور فالجامعه، و كنت حابه مجال تربيه رياضيه جدًا، وفعلًا تواصلت مع ناس كتير فالكليه عشان افهم الدنيا ماشيه إزاي، والحمدلله دخلت بالرغم ان جالي جامعه القاهرة كليه آداب انجليزي، لكن دا كان بسبب غلطه فالتنسيق لكن عافرت فيها كتير عشان ادخل اللي نفسي فيه، ونجحت الحمدلله ودخلت تربيه رياضيه، ومع اول نتيجه في سنه اولي كنت الاولي علي الدفعة بتقدير امتياز، وفرحة أهلي بيا كانت كبيرة، وهما من اكتر الناس اللي كانوا بيشجعوني في كل حاجه وكانوا بيهونوا عليا كل حاجه صعبه فالكليه، وبفضل ربنا خلصت الاربع سنين وكان ترتيبي الاولي علي الدفعه بتقدير امتياز مع مرتبه الشرف، كنت بلعب غطس من وانا عندي 3 سنين في نادي الجزيرة الرياضي، ومن سن 13 حتي 19 في النادي الأهلي، وكنت بطله جمهوريه، وانضميت لمنتخب مصر، وحققت بطولات كتير وكان الفضل لربنا و لوالدي طبعا الي كان مسئول عن تدريبي طول فتره لعبي لحد ما بطلت وانا عندي 19 سنة، دا كان بسبب اصابتي فالركبه وعملت عمليه كبيره كان صعب بعديها اني ألعب بنفس الكفاءه، بس حاليًا اولادي مكملين المسيره بعدي فالغطس مع والدي بردو اللي بيمرنهم وزينه حاليًا ما شاء الله بطله الجمهوريه اكتر من مره.


2- ما هي الدراسات التي حصلت عليها مروة حسن ؟

- فى البدايه انا اتعينت معيده في قسم تدريب الرياضات المائيه بكليه التربية الرياضية بنات (تخصص سباحه - غطس) سنه 2005، ودرست ماجيستير سنتين وكانت كل ابحاثي ليها علاقه بالغطس، وبعديها ناقشت رساله الماجستير بتاعتي سنة 2010، بعدها علي طول دخلت امتحان تأهيلي دكتوراه ونجحت فيه بتقدير امتياز، ودرست سنتين كل مواد الدكتوراه لحد ما ناقشت رساله الدكتوراه سنة 2014 وكان بردو موضوعها مرتبط بأنواع التدريب المختلفه فى رياضه الغطس، كانت مناقشه صعبه جدًا الحقيقه بس عدت علي خير وبنجاح الحمدلله وحاليًا انا بقيت مدرس دكتور، وفي الوقت الحالي فى رحله اعداد ابحاث الترقيه عشان اترقي لأستاذ مساعد، حضرت مؤتمرات كتير ومنهم مؤتمر دولي تبع الـ DAAD عرضت فيه بحث بيتكلم عن التدريبات المائيه، وكان باللغه الانجليزيه، كمان كنت من فريق الجوده داخل الكليه وحصلنا علي الاعتماد والجوده مرتين، من بعد حصولي علي درجه مدرس مسكت منصب مدير الوحدات والانشطه فالكليه، وده منصب بكون مسئوله في عن كل الانشطه الخارجية اللي بتتم داخل الكليه بعد مواعيد اليوم الدراسي سواء داخل الملاعب او حمام السباحه او صاله الجمباز، وكل مرافق الكليه اللى ممكن نستخدمها فى انشطه مختلفه سواء محاضرات او دورات تدريبيه او مناقشات او صالات تدريب، كمان اصبحت عضو من اعضاء كنترول الفرقه الرابعه، كل المناصب دي بفضل ربنا طبعا وتشجيع أهلي وكل اساتذتي فالكليه اللي بيثقوا في شغلي، وكانوا بيدعموني دائمًا وعلي رأسهم أ.د /رباب فاروق (وكيله الكليه لشئون المجتمع وتنميه البيئه سابقًا).

3- مين أول من ساعدك في إنشاء الأكاديمية ؟

- في البدايه انا كنت مسئوله عن حمام السباحه من وانا طالبه فالفرقه الثانيه، كنت بمرن مدارس سباحه وكنت لوحدي فالمكان عشان وقتها كان التدريب مقتصر علي الكليه فقط، و وقتها مكانش في مدربين معايا بعدها بدأت اشغل حمام السباحه اني استقبل مدربين من الخارج بتأجير حارات وان كمان يكون في فترات مخصصه للسيدات و فترات مخصصه للرجال و فيها بيتم تقسيم حارات خاصه بكل مدرب، بعد الفتره دي أ.د/ساميه الهجرسي (رحمه الله عليها) كانت ساعتها وكيله الكليه عينتني مديره حمام السباحه، وانا لسه طالبه فالكليه وكنت مسئوله عن كل التدريبات داخل الحمام، ومن بعديها الشغل بدأ يكبر والاعداد بتزيد وساعتها قررت اني استعين بمدربين يساعدوني فى تدريب فتره السيدات 
طبعًا الفتره كان صعب اني افكر في موضوع الاكاديمي، لاني كنت مركزه اكتر فالدراسه والتعيين فالكليه لكن بعد ماخلصت الحمدلله و اتعينت بدأت اركز فى ان ليه ميكونش في أكاديمي بأسمي وطبعًا دا بجانب شغلي فالكليه وخصوصًا ان الناس بدأت تيجي الكليه مخصوص علي اسمى وانى اكون مسئوله عن تدريبهم، قررت وقتها اني انفذ حلمي وابدأ في خطوات الاكاديمي واكتر ناس شجعوني علي الفكره كان زوجي و أهلي طبعا وكمان المدربين اللي كانوا بيساعدوني فالتدريب ك/نعمه ك/عزه ك/علياء ك/رانيا، وفعلًا وقتها بدأت افكر اول حاجه فى شكل اللوجو الخاص بالاكاديمي واختارت اسم bubbly swim academy وكان اللوجو علي شكل bubbles والسبب لاختيار اللوجو دا ان التنفس هو أول خطوه في تعليم المبتدئين السباحه، وبفضل ربنا من اول ما بدأت وكل الناس بتشجعنى وواقفين دائمًا في ضهرى في كل خطوه.


4- لماذا اختارتي السباحة أكثر من أي نشاط آخر، وبالأخص السيدات والأطفال؟

- اولًا: الغطس هو التخصص الأول ليا في الرياضه، بس لما دخلت الكليه مكانش فيها تخصص غطس لانها كانت شعبه عامه يعني بندرس كل حاجه من غير تخصصات و طبعًا كان في سباحه فى الاربع سنين، و فى وقت محاضره السباحه كنت بساعد كل زمايلي في الشعبه انهم ازاي يتعلموا يعوموا واعلمهم ازاي يقدروا يتغلبوا علي خوفهم من المياه، ومن وقتها وانا حاسه اني اقدر اعلم حد ازاي يعرف يتعامل مع المياه لحد مايوصل لاعلي مستوى في السباحه.

- ثانيًا: طبعًا ان ممارسه السباحه ليها مميزات كتير اوى في حياتنا، و اهمها انها بتساعد علي تقويه مناعه الجسم وكمان تعتبر من اسهل انواع الرياضة اللي ممكن نمارسها عشان نحافظ علي مستوى اللياقه البدنيه، لجسمنا
اما بقي بالنسبه لاختيار الاطفال والسيدات فالسبب ان الاطفال هم اكتر فئه من الاساس انهم يتعلمو السباحه (علموا أولادكم السباحة والرماية وركوب الخيل) ودا حيث الرسول (ص).

- ثالثًا: فالصيف طبعًا الناس بتسافر عشان المصيف، واكيد الاهالي بتكون محتاجه انهم يتطمنوا علي أولادهم، وهم بيلعبوا فحمام السباحه عشان كدا احنا بالأكاديمي بنهتم بتعليم الاطفال أساسيات السباحه بمعني انهم ازاي يكونوا متحكمين في جسمهم داخل المياه، وطبعًا بيكون فى اطفال عندهم استعداد عالي جدًا للتعلم، وانهم يكملوا فى مجال السباحه ودول طبعًا بنستمر معاهم في التدريب لحد تأهيلهم لدخول اختبارات النجوم الخاصه باتحاد السباحه بدايه من 9 سنوات، اما باقي الاطفال بيكون هدف أهلهم الاطمئنان عليهم داخل حمام السباحه من باب الترفيه مش اكتر، أما بالنسبه للسيدات بيكون في منهم كتير نفسهم يعرفو يعوموا لكن للاسف معتقداتهم غلط ان انهم مش هيعرفوا عشان سنهم كبر مثلًا، و للأسف غلط لان تعليم السباحه مش للاطفال فقط، فأنا كنت محتاجه اني اغير المفهوم الغلط دا عند ناس كتير، فقررت اني اركز علي فئه السيدات كمان ايآ كان السن كام او الوزن حتي، لكن موضوع التعلم بيتوقف فقط علي قدرات كل فرد في درجه وسرعه استيعاب المعلومه يعني ملهاش علاقه بالسن والوزن زي ما الناس فاهمه، وكمان دلوقتي بقي فى مسابقات خاصه بالسن الكبير بدايه من 20 سنه وفي دول من 18 سنه كمان واسمها masters swimming.


5- أبرز الإنجازات التي حققتها الأكاديمية ؟

- في البدايه كنت شغاله لوحدي وكان فحمام سباحه الكليه فقط وكان مقتصر علي تدريب المدارس يعني مجموعات كبيره بيتمونوا مع بعض لمده ساعه فقط، بعديها بدأت اعمل تدريب مجموعات اصغر يعني عدد مثلًا من 4:5 أفراد فالساعه الواحدة، و ده طبعًا عشان الناس تستفيد اكتر لان في مستويات كتير منهم المبتدأ ومنهم اللي عنده خلفيه عن السباحه، وكمان عملت تدريب برايفت يعني يكون فرد واحد مع المدربه ودا للاستفاده الاكبر،
الخطوه اللي بعدها اني بدأت ادور علي فروع تانيه للاكاديمي وفعلًا عملت deals مع اكتر من فرع، والحمدلله bubbly swimming academy بقي ليها 9 فروع بتغطي القاهرة والجيزة، عشان يكون في فرص لكل الناس انهم يمارسوا السباحه وفروع الاكاديمي موجوده في (الزمالك - المعادي (فرعين) - مصر الجديده (فرعين)- الهرم - اكتوبر - حدايق الاهرام - التجمع)، وان شاء الله قريبًا هنبدأ فالمحافظات الاخري، وكمان من انجازات الاكاديمي ان فيها اكتر من تخصص غير تعليم وتدريب السباحه ومنهم: 


• تعليم وتدريب سباحه للاطفال
• تعليم سباحه للسيدات
• سباحه علاجيه (تأهيل مائي)
• اختبارات النجوم للاطفال
• دورات انقاذ واعداد معلم 
• Aqua aerobics
• Aqua fitness

التأهيل المائي او السباحه العلاجيه دي من اهم التخصصات اللي بيحتاجها كبار السن، اللي بيعانوا من مشاكل كتير وكمان الناس اللي بتكون خارجه من عمليات ومحتاجه تأهيل مائي، لانه يعتبر الافضل ليهم عشان وزن الجسم بيكون صفر داخل المياه، و مش بيكون في ألم اثناء ممارسه التدريبات المائيه، وانا اللي بكون مشرفه علي السباحه العلاجيه ودا بحكم اني مديره مشروع (دبلومه متقدمه في التدريبات المائيه) ودي من ضمن مشروعات جامعه حلوان، اقدر اقول ان من انجازات الاكاديمي اننا عندنا اطفال كتير بدأنا معاهم من الصفر لحد ما وصلوا لاجتياز اختبارات النجوم بإسم الاكاديمي 
كمان الاكاديمي حاليًا مسئوله عن دورات الانقاذ واعداد المعلم، وبنبدأ فيها من الصفر لحد ما يوصلوا للمستوي الي يخليهم يجتازوا الدوره بنجاح و كمان بعديها بنوفرلهم فرص عمل في اكتر من مكان سواء انقاذ فالانديه او مدربين في اكتر من فرع، أما بالنسبه للاكوا ايروبكس دي بتكون تدريبات داخل الماء علي انغام الموسيقي و بيكون ليها مدربين متخصصين فالمجال دا والناس الحقيق بيستمتعوا جدًا في ممارستها لانها بتدخل البهجه ف حياتهم و بتغير من روتين حياتهم جدًا، و خصوصًا السيدات سواء العاملات او كبار السن لان مبيكونش فيها اي احساس بالالم و كمان بتحافظ علي لياقتهم البدنيه.


6- ما هي طموحاتك في الفترة المقبلة وبتسعي تحققيها بالنسبة للأكاديمية ؟

- طموحاتي ان الأكاديمي تكبر اكتر، و فرعها تكون اكتر و تغطي كل محافظات مصر وتكون معروفه اكتر، ومن اكبر الطموحات ان يكون في حمام سباحه بإسم bubbly swimming academy، ونفسي كمان اطلع كوادر كتير من تحت ايدي سواء مدربين متخصصين في كل تخصص فالاكاديمي وكمان نطلع سباحين كبار.


7- الأكاديمية بتستعين بكام مدرب .. كام مدرب موجود في الوقت الحالي ؟

- الأكاديمي اول ما بدأت كان فيها 4 مدربين فقط ودول حاليًا يعتبروا الـ first team فالاكاديمي و بعديها الحمدلله العدد كبر فالاكاديمي، و بقي محتاج عدد مدربين اكبر وحاليًا وصلنا لعدد 29 مدربه بيغطوا كل الفروع فى كل المواعيد، و يعتبر من اكتر الحاجات اللي بتميز الاكاديمي ان كل مدربينها مؤهلين علي اعلي مستوى سواء حاصلين علي دورات انقاذ او اعداد معلم، كمان منهم كتير سباحين د، واعمارهم مختلفه يعني مش شرط يكون سنهم كبير بالعكس فى منهم مدربين سنهم صغير لكن متمكنين فى تخصصهم وعندهم ملكه توصيل المعلومه للناس وتصحيح اخطائهم ودي اهم حاجه وطبعاً عشان يكون في تقدم فى مستوي اداء المتدربين،
وحاجه مهمه جدًا بالنسبالي ان دمهم يبقي خفيف وروحهم حلوه لان دي حاجه بتساعدهم علي توصيل المعلومات بشكل سهل ولطيف لان المتدربين عندنا بييجوا يمكن اكتر عشان يغيروا من روتين حياتهم سواء ضغط شغل او مذاكره او ضغوطات الحياه بشكل عام و خصوصًا السيدات فبيكون هدفنا اننا نخرجهم من كل الضغوطات دي.


8- ما هي الشروط التي تضعها الأكاديمية لقبول اللاعبات والمدربين ؟

- هو احنا اكاديميه تعليم وتدريب والتعليم مش مرتبط بشروط للقبول وخصوصًا ان السباحه اي حد يقدر يتعلمها، يعني مش محكومين بسن معين ولا وزن معين 
الهدف في النهايه ام كل الناس يوصلها فكره ان السباحه من اسهل الرياضات الي ممكن يمارسوها ايا كان سنهم ودا لانها بتساعد علي الحفاظ علي صحتهم ولياقتهم البدنيه كمان.